Qırımda Rusiye telükesizlik hadimleri Yaltada yaşağan 45 yaşındaki aqaynı, Rusiye Federal telükesizlik hızmeti "ekstremizmge çağıruvlar" dep sayğan Telegram messencerindeki izaatları içün yaqaladı. Bu aqta Rusiye kütleviy haber vastaları müessiseniñ matbuat hızmetine atfı etip bildire.
"Lingvistik ekspertiza, onıñ metin yazılarında milliy alâmetke köre bir gruppa şahıslarğa qarşı zorbalıq areketlerine çağıruv alâmetleri bar olğanını belgiledi", — "RİA Novosti Krım" neşiri RF FSB-sınıñ beyanatından alıntı ketire.
Yaltalı ne yazğanı, qaysı subetlerde ya da kanallarda yazğanı aqqında müessisede aytmaylar. Tutulğan kişiniñ adı ve soyadı aydınlatılmay, onıñ açıq izaatları da yoq. Rusiye mahkemesinde qabaatı isbatlansa, oña Rusiye Federatsiyası Ceza kodeksiniñ 280 maddesiniñ 2-nci qısmıne istinaden 5 yılğa qadar azatlıqtan marum etüv cezası berilecek (İnternet ağını qullanıp ekstremistik faaliyetke açıq çağıruvlar).
Daa evel Ukrayina prezidentiniñ Qırım Muhtar Cumhuriyetindeki temsilciligi, Roskomnadzor Rusiye Federatsiyası tarafından işğal etilgen Ukrayina topraqlarında, şu cümleden Qırımda, informatsion boşluq üzerinde nezaretni quvetleştire, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
